Lögreglan á Suðurnesjum rannsakar hvort erlenda flutningaskipið Longdawn, sem var á sömu slóðum og strandveiðibátur sem hvolfdi í nótt, tengist því að bátnum hvolfdi. 

Þetta segir Ásgeir Erlendsson, upplýsingafulltrúi Landhelgisgæslunnar, í samtali við mbl.is. 

Landhelgisgæslan hefur beint flutningaskipinu til hafnar í Vestmannaeyjum þar sem skýrsla verður tekin af skipstjóra skipsins vegna rannsóknarinnar. 

„Það er verið að skoða hvort það kunni að tengjast því að þessum strandveiðibát hafi hvolft,“ segir Ásgeir. 

Frétt af mbl.is

Mannbjörg þegar strandveiðibátur sökk

Rannsókn málsins í höndum lögreglunnar á Suðurnesjum 

Strandveiðibáturinn sökk norðvestur af Garðskaga á þriðja tímanum í nótt og var þyrlu­sveit Land­helg­is­gæsl­unn­ar þegar í stað kölluð út á hæsta for­gangi ásamt sjó­björg­un­ar­sveit­um Slysa­varna­fé­lags­ins Lands­bjarg­ar á Suður­nesj­um, auk þess sem nálæg fiskiskip og bátar voru beðin að halda á staðinn. 

Einn var um borð í bátnum og var honum bjargað um borð í nálægan bát sem sigldi með manninn, sem er á áttræðisaldri, til hafnar í Sandgerði. 

Rannsókn málsins er í höndum lögreglunnar á Suðurnesjum, segir Ásgeir og bætir við að Landhelgisgæslan hafi látið rannsóknarnefnd samgönguslysa þegar vita. 

„Þannig að fulltrúar Landhelgisgæslunnar, Samgöngustofu og rannsóknarnefndarinnar fóru til Vestmanneyja þar sem skýrsla verður tekin af skipstjóra flutningaskipsins.“

Vel gekk að koma bátnum til hafnar 

Aðspurður kveðst Ásgeir ekki hafa upplýsingar um líðan mannsins en sjúkrabíll beið hans á bryggjunni í Sandgerði þaðan sem farið var með hann til nánari skoðunar. 

Björgunarsveitir drógu bátinn til hafnar í Sandgerði og segir Ásgeir það hafa gengið vel. Nú sé það í höndum lögreglunnar á Suðurnesjum að rannsaka bátinn og ræða við þá sem að málinu komu. 

Björgunarsveitir drógu strandveiðibátinn til hafnar í Sandgerði. Ljósmynd/Áhöfnin á Hannesi Þ. Hafstein

Tengdar fréttir

Sjávarháski við Garðskaga

Skipstjórinn undir áhrifum við slysið

• Óvenju mörg útköll á sjó
• Skipstjóri og stýrimaður í farbann
• Longdawn siglir úr höfn: Farbannskrafa til meðferðar
• Lögreglan fer fram á farbann yfir mönnunum

» Fleiri tengdar fréttir

• Blogga um frétt