Sindratorfæran verður haldin næsta laugardag á Hellu. 30 keppendur eru skráðir til leiks og leita þarf aftur til ársins 2006 til þess að finna sambærilegan fjölda keppenda.
Flugbjörgunarsveitin á Hellu og akstursíþróttanefnd Heklu standa að keppninni sem hefur verið haldin nær óslitið frá árinu 1973, segir í tilkynningu.
Keppnissvæðið er í Tröllkonugili austan Hellu og áhorfendur geta tyllt sér í brekkurnar nærri keppnissvæðinu og fylgst með.
Þaulreyndir keppendur og nokkrir nýliðar munu taka þátt í keppninni að þessu sinni. Má þar nefna Íslandsmeistarann Skúla Kristjánsson og fyrrverandi Íslandsmeistarann Jón Örn Ingileifsson.
Í tilkynningu segir að á síðustu árum hafi um 5.000 manns verið á svæðinu til þess að skoða græjurnar og sjá þær takast á við brautirnar.
Bein útsending verður frá keppninni á Youtube og Rúv 2.